SUNDAY SCHOOL "METHOD OF TEACHING"

SEMINAR ON A TOPIC “METHOD OF TEACHING”

-          Danmawia Chawngthu

Thuhmahruai

Baptist Church of Mizoram hian Sunday School hi a ngai pawimawh em em a, thiltum neiin mumal takin a kalpui mek a. A hranpa hlakin inkaihhruaina pawh a bua neiin awmze nei taka kohhran member ten Pathian thu kan zir tlan theihna turin ruahmanna a siam thin. Kum 2010 atangin Thupuiah “Zir la, Nunpui rawh” tih a hmang a, chu Sunday School thupui tih hlawhtlinna tur chuan thiltum pali a nei bawk a, chung te chu:

(a) Mi bote Krista hnena hruai (Nursery-Baptisma)

(b) Mihring dik tak ni tura buatsaih (Intermediate)   

(c) Kohhran mi dik tak ni tura buatsaih (Senior A)

(d) Pathian thu dik taka pawm leh hmantir (Senior B)

Heng thiltum pali te hmang hian Beginner atanga Senior B thlengin thu zirtur uluk taka thlan leh buatsaih a ni thin. Zirtirtu pawhin a zirtir laiin mahni department theuh ah Sunday School thil tum te rilrua hre reng chunga a zirtir a pawimawh hle ang.

1. Method of Teaching

Sunday School zirtirna ah hian method hrang hrang a awm thei ang a, chung method te chu thiltum nen a inzawm tlat tur a ni. Thiltum awm lovin method (zirtir dan) a siam ngawt theih loh va, thiltum a hlawhtlin na tura rahbi tukna hmasa ber a ni. Miin eng thilah pawh rahbi a rah fuh loh chuan a thiltum leh thlen tum a thleng thei lawk dawn lo a ni. Amaherawhchu, a thiltum ah a chian a, rahbi a tuk thiam chuan awlsam tein a tum a hlen thei ang.

Chutiang chiah chuan vawiina Sunday School kan zirtirna kawng leh Sunday school thiltum te tih hlawhtlin kan tumna kawngah rahbi (zirtir dan) tha leh dik tuk kan tum dawn a ni. A tlangpui a method hman theih leh hman lar thin te lo bih hmasa ila;

(a) Lecture Method: Zirtirtuin a theih ang anga sawifiaha zirtirna a pek hi a ni. Zirlaiten tihtur an nei vak lova, ngun deuhva lo ngaihthlak a ni deuh mai. Zirna in (school & institution) hrim hrim leh Sunday school thlenga kan hman rim ber method a ni. A awlsam a, hun leh tha a heh lova, hmanrua hman teh chiam a ngai lo bawk. Zirtirtu chu resource kan lakna hnar a ni a, thu sawia tawngtu ber pawh zirtirtu niin zirlai te chu dawhthei taka ngaithlatu leh dawngsawngtu (passive listener) an ni mai thin.

(b) Seminar Method: Seminar method in a tum ber chu zirtirtu kaihhruaina hnuaia mi tlem zawkin ngaihdan leh hriatdan an thawhkhawm a, chuta tanga thil zirchhuah chu a ni. Group te zawka in then a, an zirlai atanga zawhna leh issue awm thei sawi khawm anih avangin hun a heh a, zirtirtu an ngai tam. Mahse zirlai tin te chu dawngsawngtu (passive listener) ni ringawt lova telvetu, sawivetu (active participants) an nih avangin an thilzir chhuah chu anmahniah a intuh nghet bik thin.

(c) Recitation Method: He method in a tum chu zirlai te an zirtur pek a, an theih ang ang a an lo inbuatsaih a, zir hunah tawngka emaw ziak emaw a an hriatsa an rawn sawichhuah leh hi a ni. Thuvawn kan insawi tir ang deuh hi a ni ang chu. Zirlaite kutah a in nghat nasa a, an thiam tur leh recite tur an zir nasat poh leh hriatreng tur te, zir chhuah tur te an nei tam dawn tihna a ni.

(d) Conversation Method: He method ah chuan conversation anih angin thil sawi hova, ngaihtuah hova discussion tha tak neih a rawn kawk a. kan zirlaia zawhna leh chhanna awmte a hmuna inzawha inchhan nghal a, discuss zui lam a hawi ve thung. Tuna Senior B lama kan kalpui dan nen hian a inpawl viau va, amaherawh chu conversation tak erawh kan nei tam lem loh avang hian sawi ho tur chhawp chhuah awm tho mahse he method ang lutuk chuan a takah kan kal chiah lo deuh.

2. Zirlai te dinhmun

(a) Nursery, Beginner & Primay: Naupang te zawk te chuan a tlangpuiin taksa a tel ve (physically enggage) an duh thin. Ngaihdan leh pawm dan an la sawi thiam lova, thawnthu an la ngaithla tui thei tak tak lo. Chuvangin an thil zirlai an hriat thiam theih nan kut leh ke tih chettir tam a ngai fo. Entirnan, zirtirtu in “a hria zawng ban phar ang….. a hmu tawh zawng ban phar ru le” han tih te, a tul ang zela hnar khawih tir te, ke han per tir ang te pawh a remchang em em a ni. Thil tam tak an hriat sen loh avangin thil pakhat emaw pahnih emaw an zirlai atanga an hriatreng tur chi anmahni ah taksa tih chet hmanga kan tuh thiam a pawimawh.

(b) Junior, Baptisma: Thawnthu leh fiamthu te an ngaina tawh a. Ban inphar tir leh naupang chhe bawla in bawl lutuk an duh vak tawh lo. Nuih heh rual an ni a, an emotional em em a. zirlai zirtir paha nuih za han siam zauh te, thawnthu han zeh zauh zauh te a remchang em em a. Thufing pakhatin “I nuih tir theih chu i tah tir thei ang” a tih ang deuhvin, an emotional na hmang tangkaia an attention kan lak thiam lehzual a pawimawh hle. Chumi awmzia chu zirtirtuten kan control thei in kan control thiam a pawimawh tihna a ni. Zirlaibua awm te han sawifiah leh zual nana thawnthu tawi han zeh zeuh te a tangkai hle.

(c) Intermediate, Senior A: Tleirawl, inti nula tlangval chho tawh an ni a, an rilru a puitlingin Pathian thu pawh an man thiam em em tawh a, zawhna pawh nei khirh rual an ni. An thil zir mek chu an nitin nun atan a pawimawh em?, engtin nge an hman tangkai ang? Tih te ngaihtuah nachang an hre tawh a, ngaihthlak ngawt ngawt emaw, tute emaw chanchin ngaithla satliah mai mai emaw angah an in chan chuan an ning hle thin. Mihring nun leh nitin nuna a pawimawhna lai leh ataka an nunpui theihna tur sawichhuah thiam a pawimawh a, chu chu an beisei lian ber anih duh fo. Knowledge tih zauhna tur ngawr ngawr ai chuan ataka hman theihna lam kawng zirtir thiam an tha.

(d) Senior B: Puitlingah chuan a tlangpuiin zawhna a tam a, sentence tinah sawi ve tur emaw, rawtna emaw, zawhna emaw, belhna emaw an lo nei tlangpui tawh. Chuvang chuan ngaihthlak tawp pawh thiam viau mahse, Sunday School kai apianga ngaithla ringawt tur chuan nin chin an nei duh viau. Hriattur emaw chanchin emaw information emaw pek kumtluan leh a dawngsawngtu nih reng ringawt hi ninawm a ni duh viau ang. Sawihona hun hawn anih hian sawi tur nei, mahse hun a chep tawh vang te, inthlahrun vangtea sawi lo an tam thei viau a ni. Anmahniah zawhna a tam avangin a sawitu leh zirtirtu pawhin zawhna ang zawnga zirtirna a kalpui thiam a pawimawh.

Entirnan, Mathaia 9:1-7 (Isua chu lawngah a chuang a, râl lehlam a kai a, a chênna khua chu a va thleng a. 2Ngai teh, zeng pakhat, a mutna chawpin a hnênah an rawn zâwn a. Isuan an rinzia a hmuhin zeng hnênah chuan, “Ka fa, thlamuang takin awm rawh, i sualte ngaihdam a ni ta e,” a ti a. 3Dân zirtîrtu ṭhenkhat chuan, anmahni zîngah, “He mi hian Pathian pawi a sawi a ni,” an ti hlawm a. 4Isua chuan an ngaihtuahte chu a lo hria a, “Engah nge in thinlunga sual in ngaihtuah ni? 5‘I sualte ngaihdam a ni tawh e,’ tih nge sawi awla, ‘Tho la, kein kal tawh rawh,’ tih hi? 6“Khawvêlah hian Mihring Fapa hian sual a ngaidam thei tih ka han hriattîr ang che u,” a ti a; zeng hnênah chuan, “Tho la, i mutna kha la la, i inah haw rawh,” a ti a. 7Tichuan, a tho va, a haw ta a. 8Mipuiin chu chu an hmuhin an hlau va, chutiang thuneihna mihringte petu Pathian chu an fak a.)

Isua khan Pathian sawichhetu (blasphemer) a puh a ni. “Pathian sawichhetu ka ni lo” ti mai lovin zawhna a siam let a, a nihna a sawifiahna turin thu tluangtlam hmang lovin zawhna zawtin a sawifiah zui a, kha khan a thusawi tum tichiang leh zual a, a lo ngaithlatu te rilru (attention) pawh a la viauin a rinawm.

3. Eng Method ber nge kan hman ang?

BCM Theiriat ah hian department zawng zawng huapa chu mi method chu hmang ang u emaw, hman tur a ni emaw kan ti thei lo. A chhan chu zirlai te an in ang lova, zirlai te dinhmun leh thu an dawn sawn dan a in an loh avangin. Tin method pakhat chauh kan hmang ngawr ngawr thei lo bawk a, a inchawhpawlha kan hman thiam pawh a ngai ang. Chutih lai chuan kan hman tlanglawn ber erawh chu kan mamawh tam loh ber leh effective lo deuh ber lecture method hi a ni lawi si a. Zirtirtuin thiam ang tawkin a sawifiah a, chu chu zirlai ten an lo ngai thla thin a nih hi. Anih chuan eng nge kan hman tak ang?

(a) Nursery, Beginner leh Primary: He mite age group atan chuan Recitation Method a tha ber turah ngai ila, ngaihdan an la sawi thiam lova, thil hrilh chiam pawh ni ila an rilruah a intuh tak tak lovang. An mah niin an phak ang tawh a an by-heart a, an recite a, nakin thlenga an hriat reng tur thil thiam tir a hlu berin a rinawm a ni. Thuvawn sawi thiam tir ngei ngei tum tur. Chu mi karah chuan tlem tlema an hriatna tih pun nan physical engagement hmanga thil zirtir an tul bawk.

(b) Junior leh Baptisma: He mi age group ah chuan Lecture Method leh Recitation Method chawpawlh fo a tha berin a rinawm. A chhan chu ngaihdan an la sawi thiam tak tak lova, zawhna zawt pawh ni ila, tawi te te bakin min la chhang thiam vak lo. Kawng leh lamah chuan thilsawi ngaithla thiam lova, hrethiam lo tur khawpin naupang chhia an ni tawh lo thung bawk. Chuvang chuan Lecture pek nawm lai tak, thuawih lai, zirtirtu ngaihsak thiam tak group an ni. Chuvang chuan lecture han pek a, theih ang anga zirtir mawlh mawlh bakah an thiam ve tur leh byheart ve tur pek fo a pawimawh. Thuvawn en lova sawi thiam tir ngei ngei tum ni bawk se.

(c) Intermediate leh Senior A: Sawi tak angin ngaihdan leh thlir dan nei rual an ni tawh a, an rilruah zawhna pawh an nei fo tawh. Chuvang chuan Conversation Method hman hi a tha berin a rinawm. A chhan chu anmahnia group te zawka inthen a, mawhphurhna sang lutuk pek a, topic sawi hova thil sawichhuak tur chuan an la rinawm lutuk loh avang a ni. Zirtirtu kaihhruaina hnuaia zirtirtuin thiam taka zawhna a zawh atanga ngaihdan sawi erawh an thiam em em tawh. Entirnan, “Zu hi sual a ni” tih thupui sawi ho tir ngawt ai chuan, “Zu that lohna han sawi teh? emaw, zu in nasat in a nghawng te han sawi teh?” tih ang zawngin zawt ta ila, an chhang thiam em em dawn a ni.

(d) Senior B: Puitling lamah hian duhthusamah chuan pawl kan inthen dan ang emaw, a aia group te zawk hian zirlai zir thei ila, hun nei tam deuhvin sawi tur pawh sawi ho thin ila a tha ber awm e. Chu mi atan chuan Seminar Method hi Puitling lama hman tur atana tha ber niin a lang. Sawi tak angin puitlingah chuan sawi tur kan nei fur a, ngaihthlak ngawt ngawt kan ning a, ngaihdan nei vek kan nih tawh avangin kan ngaihdan leh hriat thiam dan sawichhuahna remchang kan neih a pawimawh. Tuna kan kal dan a, mi pakhatin kan vaia min zirtir pawp a, lecture method hman hi chuan zirlaia kan rilru pek dan pawh a pawn lawi deuh niin a hriat.

4. Methodologically a kan harsatna te

(a) Kan Sunday School kal dan system a fuh lo. A hun leh a hmun hi chu a la tha reng mai. Mahse Sunday School tan hun kan pe phal tlem ta lutuk a, zirtirtu leh zirlai te a tu te pawh hian a tak takah chuan ‘ban vat vat’ hi kan duh ta vek mai. Uluk taka zir a, hlawk taka Sunday school kan neihna tur chuan zirlai zir nan darkar chanve tal pe thei ila, zirlai te pawhin zawhna zawtin sawi ho thei ila, hma kan sawnpui viau ang. Tunah chuan minute 15 velah inkhung len vek kan tum ta a, chu chuan loh theih lohvin lecture method min hmantir lo thei lo.

(b) Lawmman lam kan dah pawimawh lutuk. Engnge kan zir chhuah a, eng hlawkna nge ka neih, enge ka hriat belh, ka hriatthiam loh hriat thiam thar ka nei em tih lam ai chuan zirtirtu in ka hming a present em, Sunday school ka kai hram hram chuan kum tawpah lawmman ka dawng ang tih rilru kan put nasat tawh em vang hian Method tha tak tak, kan hlawkpuina tur thil te hi a takin kan hmang thei lo.