BIBLE SOCIETY OF INDIA LEH THEOLOGY

 

BIBLE SOCIETY OF INDIA: THEIRIAT AREA COMMITTEE

COLLECTORS SEMINAR PROGRAM (2^nd Session)

2^nd Battalion MAP Kohhran Biak In                                                              Dt 20.05.2023 (Saturday)

“Bible Society of India leh Theology”

-          P/P Danmawia Chawngthu

Thuhmahruai

Vawiin Collectors Seminar ah hian kan thupui zir ho tur pakhat atana ka thlan chu Pathian thu (Theology) leh Bible Society of India inkaihhnawihna lai hi a ni. Hei hian kan thawh tawh dan a thlir ang a, kan thawh zel dan tur te pawh a hril thei ang. Bible Society hi tum mumal nei lo leh Bible behchhan emaw Pathian thu behchhan nei lo a ni ngawt lova, India ram pum bakah local level thlenga a pawt kaltute hian rawngbawlna a nihna kan man em em a, thahnem pawh kan ngai viau a ni. Bible chhut leh chhuah thuah direct-in tel ve chiah lo mah ila chutianga Society in hna a thawh theih nan sum leh paiin kan lo tanpui thin a. Branch te, Area leh Local level committee a kan tih ber leh kan hna ber pawh sum lakkhawm leh mipui ten sum kan thawh zel theih na tura mipuitea BSI chanchin leh a tulna te hriattir zel hi a ni.

1. BSI Thiltum bulpui:

BSI thiltum leh vision ber chu mitin ten an hriatthiam tur tawng ngei a Bible an neih theih na tur leh an lei zawh tawk ngeia tlawm a Bible an hmuh hi a ni. Chu mi tur chuan hma a la nasa em em a,  chu Bible siam leh sem hi BSI hnapui ber leh a mission ber a ni. Chu mi hmang chuan mi tam tak te hnenah Bible an mahni tawng ngeiin an lo hmuin an lo chhiar ve a, Pathian ram tihzauhvin a awm zel a ni.

2. BSI Rawngbawlna hi Mission a ni:

Mission chu kohhran hnapui ber, ringtu apiangin kan tuipui ber tura Lal Isua thupek a ni. Martin Kahler an “Mission hi theology bulpui (mother of theology) a ni” a tih angin Pathian mission tel lovin Pathianthu a kalpui thui theih lohva, a tui theih lohva, a rintlak tawk lova, a him lo bawk. Chuvang chuan rawngbawlna kan tih zawng zawng hian a kawh tum leh a tawpa a luhna tur chu Pathian mission hi a ni kan ti thei ang. Chu mission chu Pathian atanga chhuak, a hmangaih em em te sualin a tih natna atanga dam leh na tura buatsaih hnapui a ni. Amah Pathian ngei hi mission tantu, mission neitu leh mission bul tumtu a ni. A fapa neihchhun meuh tira mibote zawngtu leh alama hnuk hnaitu a ni. Chu Pathian mission chu keini hian kan chhunzawm a, a thawktu kan ni a, kan hnathawh dan leh kan hmanraw hman chi hrang hrang nen kan bei mup mup a nih hi.

            2.1. Mission hna a thawh dan: Chu Pathian mission chu Bible Society of India pawhin hmuchiangin miten Lal Isua chanchin an lo hriata an lo rin ve theih nan a chanchin inziahna Bible hi an hmuh theih leh chhiar theihin kan chhawp tur a ni tih thiltum neiin a thawk ta. Kohhran hrang hrang leh Mission agency hrang hrang ten missionary (mihring) an intirchhuak a, BSI erawh chuan Bible a tir ta thung. Hrilhtu awm lo pawh nise, sawifiahtu awm lo pawh nise miin Bible a chhiar hrim hrim chuan a tinungtu Thlarau Thianghlim puihna in thu nung chu a hmu em em ang tih a ring tlat a, Bible thawn chhuah leh thehdarh a la sim thei lo. Rah pawh tam tak a chhuah tawh reng a ni.

            2.2. Mihring (Missionary) intirh aia a thatna: BSI in mission a thawh dan hi thatna tam tak a nei a, missionary intirh hi a that em em laiin mihring chuan harsatna tam tak a nei a, thlen theih lohna hmun a nei a, sum leh pai a ngai tam a, hun a hek a, tawng zir chawp te a ngai a, a va kalna tur mi te nen inpawhna tha a siam thiam viau pawh a ngai. BSI erawh chuan Bible a thawn hian mihring thlen harsatna hmunah a thleng thei a, sum sen tam a ngai lova, tawng zir chawp a ngai lova, a chhiartur leh hre tur dik tak ten an hriatthiam tawngin Lal Isua chanchin an hre nghal thei. Hei hi a thatna em em chu a ni.

2. BSI leh Prosperity Gospel:

Saptawng thumal prosper tih chu mizo tawngin hamtha, hmuingil, hlawhtling tiin kan sawi thei ang a, prosperiry anih chuan hamthatna, hmuingilna, hlawhtlinna tihna a ni. Prosperiry Gospel/theology anih chuan Pathian thu a eng zawnga thlirna, Pathian thuawih hi damreina, malsawmna, hlawhtlinna leh hmuingilna a ni ti zawnga zirtirna a ni. Chu chuan a huam chu Pathian chhandamna hian kan thlarau chhandamna chauh ni lovin taksa lama harsatna, natna, hrehawmna, damlohna leh retheihna atang pawha min khaichhuah hi a tum a ni. Chutiang theology tuipuitu te chuan ‘Pathianin amah ringtute hi hriselna leh hausakna tein malsawm a duh ber a, Isua tlanna ah khan retheihna, hrisel lohna leh natna zawng zawng te hneh a ni vek tawh tih hi an rindan a ni.

Pathian thu (theology) hi thlirna hrang hrang leh kalphung hrang hrang a awm a, hnam a zir te, ram a zir tein kan tuipui leh hawi zawng a in ang lo. Vawiina Mizorama Pathian thu virvel kan thlir chuan Kohhran te chuan Evangelical theology kan tuipui ber a, pawlchhuak kan tih lam awntute hian eschatological lam an uar em em a, tunlai thangthar ministry kan tih ho hian he kan sawi mek prosperity gospel kan tih hi an thupui ber a ni.

            3.1. BSI leh Prosperity Gospel: BSI a member ni tawh te, ni mek te leh ni zel tur tea ngaihdan nghet tak inphum ve tlat chu malsawmna hnar a ni tih hi a ni. Kan fate Life member kan nih tir hian hrisel sawt tura ngaihna kan nei a, kan motor kan life hian tluang sawt turin kan ngai a, kan building te member kan nihtir hian chhiatna lakah him phah turin kan ngai a, kan ranvulh te kan life member tir hian beisei let kan nei thin, chu chu hriselna leh than duhna a ni. Pathiana beiseina neih hi ringtute tih tur chu a nih reng laiin, kan hlawkna, malsawmna, hmuingilna lai ringawt kan thlir a kan beisei nasat lutuk hian kan ringtu nunah nghawng tha lo a nei thei-Pathian rinhlelhna leh a laka beidawnna.

BSI rawngbawlna hi ringlo mite leh Ringtharte pawhin anmahni tawnga Bible an chhiar vea Lal Isua hi an lo nunpui a an lo hlawpui ve na tur lam aia mahni hlawkna zawk, a dawngtu aia a petu zawkin hlawk kan tum hi thlirna fuh lo a ni ve thei. Chutiang zawnga miin rawng a bawl tawh chuan mahni hmasialna a lian tulh tulh a, miten Lal Isua hmel an lo hmuh ve phah em tih aiin keiin ka hlawkpui em, ka hausak pui em tih lam kan dah lian ber zel. Chu chu Prosperity theology kalsual theihna lai a ni. Chutiang zawnga miin BSI rawngbawlna a ngaih tlat chuan BSI thiltum a thelh a ni.

            3.3. Chu chu a pawi em? Sum ber kan hmuh chuan a tha tho lawm ni? Hlawkna kan beisei emaw beisei lo emaw, a sum ber kan pek a, chu mi hmanga miin chanchin tha an lo hmuh chuan a result a ngai reng tho a ni lawm ni? Heng hi kan rilrua zawhna awm a nih ka ring. A dikna chen a awm. Bible chhut zel nan sum kan mamawh a, chu sum chu miin an pek khawm a ngai. Chu mi petu turin hamthatna beiseia pek a phur phah chuan emaw a pek tam phah chuan hamthatna beisei miah lova pe tlem ai chuan lukhawng a nei zawk ngei ang. Mahse, pek tam aia pek dik duhtu, a pawisa aia petu thinlung buktu, mihring te thil neih aia mihring zawk beisei tlat tu kan Pathian ngaihah engtin nge ni ang le? Sum hlawkna um ringawt a campaign hi a that ka ring lo ang bawkin hamthatna dawn tum ringawt vanga sum pek pawh a tha chuang lovang. A chhan chu miin beisei nei ran chunga Pathian a pek hian charity (thilthlawn pek/hmangaih thilpek) a ni lova investment (peipunna/leia rokhawlna) a ni. Thilpek hi Pathian laka kan rilru put dan lantirtu a ni si a, Pathian kan hmangaihna avanga pe tur kan nihna hi kan dah pawimawh hmasa ber tur a ni, chu mi avanga malsawmna leh hamthatna chu Pathian lam chan, kei nin kan um viau tur niin a lang lo.

3. BSI leh Church Unity:

Kohhran te inlungrualna leh thawhhona hian Kristian theology ah hmun pawimawh tak a chang thin. Hmun khata luan khawm vek emaw Kohhran pakhata insuih khawm lam emaw a tum a ni lova, kohhran hrang hrang, duh dan leh rin dan hrang hrang ni mah ila, kan thawk ho thei a, rawng kan bawl ho thei a, kan inlung rual thei a ni tih thu a ni ber. Pathian ram aia kohhran pawl dah lenna a lian em em a, thil tam takah kan thawk ho thei lova, ram kan inchuh a, kohhran dang te thanna dip duh hial khawpin kan inep tawn nasa em em. Chutiang ang hri tha lo karah chuan thawhho te pawh kan tum thin MKHC angin kan han ti viau a, a harsa. Mizoram People Forum angin kan che viau dawn a, a harsa. The Leprocy Mission lamah te pawh kan lung a rual viau hlei thei lo. Tunah Council of Churches in Mizoram (CCIM) in bul tan leh mek a ni a, kan puitlin thei ang em a hriat loh. Mission Field thlenga kan inepna kara kan khawsak lai hian he Bible Soiety hmang erawh chuan kan thawk ho tha em em a ni.

Kohhran hrang hrang rawng inbawl tawn te a harsa em em a, kohhran danga inkhawm leh thusawi te, hmun danga rawngbawl hova chhuah ho pawh a harsa, mahse he BSI hian remchang min siam sak na sa em em a. Inrem theih lohna sual chu BSI hmanga do mek a ni. A kal zel ang a, a fawng vuantuten kan zir chuan rah tha zawk a chhuah zel turah ngai ang. Chanchintha hril te, ruihtheih thil avanga harsatna te, HIV/AIDS kaihhnawih te, natna chi hrang hrang avanga harsatna kan tawh mek te hi kohhran mal tana sut zawh rual a ni lo, kan thawh hova kan beih tlan a ngai a ni. Chu thawhhona chu BSI hmanga tih len zel I tum ang u.

4. Engtin nge ni zel ang?

A chunga mi te kan han thlir pawh hian BSI hi pawl satliah mai mai emaw Parachurch rawngbawlna satliah mai mai a ni lo tih a chiang viau mai. Lal Isua rawngbawlna leh thupek hnuhnung (Ramtina kala chanchintha hril hna) chhunzawmna a ni. Chuvang chuan:

            4.1. Kan tawpsan mai mai thiang lo: Khawvel pumah tawng 6405 vel a awm a, chung zinga 5000 dawn te chuan mahni tawnga Bible chhiar tur an la nei lo. India ram chauh  pawh thlir ila, tawng chi hrang 1650 a awm a, hmang kawp thei te nena chhutin tawng chi hrang 300 ah hian Bible letling thei ila India ram kan tuam chhuak thei ang. Mahse chuti tur pawh chuan tawng 228 vel kan la hmabak tihna a ni. Keini Bible kan neih tan kum (Luka ziak, 1898) atangin kum 125 a liam tawh, mahse kan chhehvel mai ah, Aizawl Auxiliary huamchhungah hnam hrang hrang pakua ngawt ten mahni tawngin Bible an la nei lo. Hna a va la tam em! Kan thawh uar sauh sauh a la ngai reng a ni.

4.2. Kan Tawngtai zel ang: Khawvela Bible Society te inthlunkhawmna United Bible Society (UBS) chuan heti hian a sawi a, “Bible Society mamawh hmasak ber chu tangka ni lovin tawngtaina a ni.” Tawngtaina a ngaih pawimawh em avangin a khat tawkin Bible Society hrang hrang te hnenah tawngtaina tur thu a thawn thin. Tin, Global meeting hrang hrangah tawngtai session uluk taka hman thin a ni. Tawngtai hi kan chakna hnar a ni a, eng anga sum tam pawh nei mah ila Pathianin mal a sawm loh chuan emaw mihring taka kan enkawl chuan a thawh hlawk tak tak chuang lo.

4.3. Thilpek kan pe zel ang: Mimal ang te, pawl ang te, kohhran ang te in a theih ang angin thil pek uar ila, member nih theihna kawng te, donation leh thil dang BSI in sum a tuakna ang chi hrang hrang te a khat tawka puanzar reng ni thei se. Tunlai hian Bible pum letling tur hian kum 8-15 vel mamawh a ni a, Thuthlungthar chauh pawh kum 5-8 an bei thin. Bible bu pum lehlin hna thawk zo turin cheng nuai 32 – nuai 120 te mamawh a ni thin. Bible lehlin hi a hautak em em a, hun a duh rei a, sum sen a tam a, a print na leh sem kualna ah sum tam tak a kal bawk thin. Bible la nei lo te tuam zel tur chuan sum a awm belh zel a ngai a, kan level theuh ah tan la zel ang u.

 

BIBLE SOCIETY OF INDIA (BSI) CHANCHIN

 

BIBLE SOCIETY OF INDIA: THEIRIAT AREA COMMITTEE

COLLECTORS SEMINAR PROGRAM (1^st Session)

2^nd Battalion MAP Kohhran Biak In                                                              Dt 20.05.2023 (Saturday)

“Bible Society of India (BSI) Chanchin”

-          P/P Danmawia Chawngthu

Thuhmahruai:

Vawiin BSI Theiriat Area collectors seminar ah hian BSI chanchin te, BSI tulna leh pawimawh na leh hmalak mekna te kan hriat thar lehna a nih beiseiin zir ho ila. Area leh Local committee hruaitu kan nihna te, collector kan nihna te chu awm reng mahsela kan tualchhung kohhran theuhvah nihna leh mawhphurhna lian tak tak leh ngaih pawimawh awm tak tak kan neih hlawm avangin BSI rawngbawlna hi kan lo hlamchhiah deuhvin keimahniah pawh a lo nung lo riau tawh thei. Chutiang thil awm thei te thlir chungin BSI chanchin I zir thar leh ang u.

1. A Nihna leh Thiltum:

Bible Society sawi chuan tleirawl kum 15 mi Mary Jones chanchin atangin kan tan lo thei lo. Bible neih duh avangin km 42 zet kein a kal a, harsa takin Bible a nei ve hram. Chu chuan mite thinlung a hnehin Bible hi mi tam tak te ban phaka a awm a, a copy hi a tam thei ang ber siam a ngai a ni tih ngaihdan a rawn hring chhuak a. Kum 1804 ah British & Foreign Bible Society (BFBS) chu din a ni a, chuta tang chuan ram hrang hrangah Bible society a ding chhawm ve ta zel a, 1946 a lo nih meuh chuan ram hrang hrang 13 a Bible Society te chuan inthlunzawm nan United Bible Society (UBS) an din ta a, tunah hian Bible Society 154 lai a inthlun zawm mek a ni.

London-a Bible Society a din hnu lawk 1811 vel atangin Calcutta Auxiliary dinin India in a hmelhriat ve nghal mai a ni. Hun a kal zel a, kum 1944 ah BFBS atangin a in dang a, 1965 ah tuna a hming Bible Society of India hi a lo pu ta a ni. India ramah hian tawng chi hrang 1652 awm anga ngaih a ni a, chung zinga 72 te chauhin Bible bu pum hi an la nei. Tawng pahnih leh a aia tam chhiar thei leh hre thiam tam tak an awm avangin chhut dan chuan Bible hi tawng 300 ah letling thei ta ila, India rama mipui zawng zawng te hi kan tuam thei tihna a ni ang. Chu mi ti hlawhtling tur pawh chuan tawng chi hrang 200 chuang fea lehlin a la ngai tihna a ni.

Tichuan, Bible Society of India chuan Motto ah “A Servant in God’s Mission” hmangin a thiltum ber chu A duh leh a mamawh apiangin mahni tawng ngeia Bible an chhiar theih tur leh an lei phaka tlawma chhawpsak hi a ni. Bible a letling a, a buin a chhuah a, a hralh a, a thlawnin a sem reng bawk a, a mamawhtute mamawh ang zelin Bible milem te, hrilhfiahna bu te, naupang Bible te, version hrang hrang te, size hrang hrang te a siam chhuak ta reng a ni.

2. Tunlai Thil:

January 24-25, 2023 khan BSI Triennial Central Council meeting Bangalore ah neih a ni a, Aizawl Auxiliary chuan Award of Excellence – Highest Contribution Award (thawhlawm thawh tam ber lawmman) a dawng leh a ni. Council Meeting-ah hian ram pum huapa kan rawngbawlna leh sum dinhmun te thlir ho a ni a. Rawngbawlna report chi hrang hrang ngaihthlak a ni bawk. He meeting ah hian kum 2023-2026 chhunga BSI hruaitu tur thlan nghal a ni bawk a, chung te chu:

President                     : Dr. Leelavathi Vemuri

Vice President             : Dr. Vijaya Kumar Pattnaik

Treasurer                     : Mr. Deepak George Pohang

General Secretary        : Rev. Dr. Kavito Zhimo              

Heng hruaitute hnuaiah hian department hrang hrang Translation te, Church Relations and Resource Mobilisation, Marketing and Publishing, Media and Special Audience, Production leh Finance te hi Director leh Associate Director ten an enkawl bawk a, chung director zingah chuan Mizo nu Dr Hrangthanchhungi a awm ve mek bawk.

 

3. BSI Inkhaidiat dan: Khawvel puma Bible Society hrang hrang te hi United Bible Society (UBS) ah kan inthlung khawm a, BSI pawh hi chung Bible Society zinga a lian pawl leh a thawh hlawk pawl a ni reng. BSI hmunpui (Headquarters) chu Bangalore ah a awm. Headquarters hnuaiah chuan Auxiliary 17 leh Translation Centre Shillong ah a nei a ni. Auxiliary 17 (Associate Auxiliary telin) te chu

Aizawl Auxiliary         Andra Pradesh Auxiliary        Allahabad Auxiliary                Bombay Auxiliary Calcutta Auxiliary         Dimapur Auxiliary                  Gujarat Auxiliary                    Jabalpur Auxiliary Karnataka Auxiliary            Kerala Auxiliary                      North West India Auxiliary    Odisha Auxiliary

Ranchi Auxiliary         Shillong Auxiliary                   Tamil Nadu Auxiliary             Telangana Auxiliary   

Andaman & Nicobar Island Associate Auxiliary

Heng Auxiliary tin te hian Branch eng emaw zat a nei a, Aizawl Auxiliary pawh hian Branch 55 a nei a, chung zinga pakhat chu Lunglei South Branch hi a ni. Chung Branch hnuaiah chuan Area Committee te a awm leh. Lunglei extended area ah hian BCM Pastor Bial behchhanin area pawh siam tura tih a ni a, chumi ang chuan Lunglei South Branch hnuaiah hian Area Committee 8 a awm ve leh a, chung te chu Electric Area, Chanmari Area, Lunglawn Area, Theiriat Area, Hrangchalkawn Area, Zobawk South Area, Zobawk North Area leh Vaisam Area te an ni. Tichuan Theiriat Area Committee hnuaiah hian Tualchhung kohhran hrang hrang te behchhanin Local Committee 10 a awm bawk a, chung te chu BCM Theiriat, BCM Venglai, BCM Hermon, BCM Gilgal, BCM Sethlun, BCM Luangmual, SA Sethlun, PCI Luangmual, UPC (NEI) Luangmual, 2^nd BN MAP Kohhran te an ni. Heng committee inkhai diat te hian mahni level theuh ah thahnem ngai takin kan thawk theuh a ni.

4. Aizawl Auxiliary Chanchin:                 

Kum 1957 ah daih tawh khan Bible Society of India hi Mizoramah din a lo ni tawhin kan lo hmelhriat tawh a, a tirah chuan Assam Auxiliary hnuaiah Lunglei Branch leh Aizawl Branch anga din a ni. Kum 1978 June ni 1 ah Aizawl chu Associate Auxiliary-ah hlan kai a ni a, kum 1983 Feb ni 25 ah Auxiliary puitlingah hlan kai a ni. Associate Auxiliary-a hlan kai ní, June 1 chu BSI Aizawl Auxiliary din ni-ah pawm a ni. Tichuan Aizawl Auxiliary pawh chu a lo thangin a inrelbawlna pawh a felfai chho zel a, tunah hian Branch 55 lai mai a lo nei ta a ni. Aizawl Auxiliary hian Mizoram chhung bakah Tripura State pumpui leh Assam State a District pathum –Hailakandhi, Karimganj leh Cachar District te a huam a, kohhran 30 zet kan thawk ho mek.

He Aizawl Auxiliary huam chhungah hian tawng hrang hrang 33 vel awm anga ngaih a ni a, chung zingah chuan Bible pum nei tawh hi 16 chauh an la awm a, Thuthlungthar bik chauh nei 9 an awm bawk. Project kal mek eng emaw zat a awm a, chung pawhin a la huam zawh loh hnam (tawng hran hmang) 9 vel laiin Bible hi anmahni tawngin an la hmu ve lo. India ram pum leh Khawvel ngaihtuah ta ila, Bible mahni tawnga chhiar tur la nei lo an tam tur zia chu.

Aizawl Auxiliary hi India ram pumah Target sang ber leh sum thawk chhuak tam ber a ni thin a, a sum thawhchhuah zat hetiang hian han thlir ho ila:

2017-2018       -           5,76,72,312                             2018-2019       -           4,59,73,356

2019-2020       -           4,96,15,921                             2020-2021       -           4,51,64,602

2021-2022       -           4,11,84,380                             2022-2023       -           4,41,28,707

2023-2024       -           3,80,00,000 (Beisei zat)

Kumin kum kal mek (financial year) a beisei zat (minimum target) hi BSI Branch tinah sem darh a ni a, Lunglei South Branch hian 10,30,000 kan chang ve a. He Branch target hi Area ah chuan sem chhawn a ni lo va, an theih ang ang a thawk chhuak tura beisei an ni.

 

Kum 2023-2026 Aizawl Auxiliary Hruaitute chu:

President                     Rev Dr. H. Vanlalauva (PCI)

Vice President             Rev. R. Lalrintluanga (BCM)

Secretary                     Rev Remlalfaka (PCI)

Treasurer                     Lt. Col. Lalhriatpuia (SA)

Heng hruaitute kaihhruaina hnuaiah hian Office Staff eng emaw zat an awm bawk. BSI Aizawl Auxiliary hian hmunpui Bible House a nei a, leimin avanga sak that ngai a ni. Bible House Building chu June 2, 2018 ah CM Pu Lal Thanhawla’n lungphum a phum a, Project lian taka kalpui tur niin sawrkarin a pek (Nuai 407) nen Nuai 1100 estimate a ni a, BSI in a thawhchhuah tur a tam hle. April 9, 2021 ah Fundraising Campaign khuh hawnna neih a ni a, Mizoram a tualchhung kohhran hrang ah te appeal siam a ni a, BSI Branch ah target te pawh pek a ni. Lunglei South Branch hi Rs 1,50,000 target min pe a, chu chu Area tinah Branch in a sem sawm ve bawk. Tunah hian Bible House Building chhawng riata sang sak hna chu kalpui mek a ni.

5. Theiriat Area

Theiriat Area hian veng pathum Theiriat, Sethlun leh Luangmual te a huam a, kum 2021-2024 chhunga hruaitu te chu heng te hi an ni:

President                     : Upa S. Vanlalbera, BCM. Theiriat

Vice President             : (1) Pu C. Thanduha, CSM. SA. Sethlun

  (2) Upa R. Lalrosanga, BCM. Luangmual

  (3) Upa V. Thawnghua. 2nd Bn. Kohhran

Secretary                     : Rbt. H. Lallunghnema, BCM. Gilgal

Asst Secretary             : Rbt. R. Lalbiakngura, BCM. Sethlun

Treasurer                     : Upa H. Lalrothanga, BCM. Sethlun

Advisers                      : (1) Upa T. Lianchhawna, BCM. Sethlun

  (2) Upa ZD. Siamkima, BCM. Gilgal

  (3) Upa MC. Lawmkima, BCM. Sethlun

Ex-Offifio Members

Bialtu Pastors:             (1) Rev. H. Lalremruata BCM Theiriat Pastor Bial

(2) Rev. K. Lalchhuansanga, UPC (NEI) Theiriat Bial

(3) Rev. Lalbiakdika Chawhte, UPC (NEI) Luangmual Bial

He Theiriat Area Committee ah hian Local Committee Secretary 10 leh Committee member mi 16 te an tel bawk. BSI Theiriat Area hian kum 2023-2024 hian Target a siam lova, rinna a kala sum thawkchhuak turin Local committee tin te a beisei a ni.

6. Member Nih dan:

BSI Executive Committee vawi 8-na (15.09.2022) chuan BSI-a member nih theih dan a revise a, April 2023 atanga hman tan turin hetiang hian a siam

No	Membership	Pek ngai zat	No	Membership	Pek ngai zat
1	Gospel –A-Day	Rs 1 (nitin kum 1 atan)	9	Life Member	Rs 3000
2	Bible-A-Month	Rs 200 (Thlatin kum 1 atan)	10	Life to Patron	Rs 2000
3	Junior Member	Rs 500 (kum 1 atan)	11	Patron Member	Rs 5000
4	Annual Member	Rs 1000 (kum 1 atan)	12	Patron to Chief Patron	Rs 5000
5	Anniversary	Rs 1000 chin	13	Chief Patron	Rs 10000
6	Memorial Gift	Rs 1000 chin	14	Bible Inpui	Bi tuk awm lo
7	Bible Missionary	Rs 1000 (kum 1 atan)	15	Donation	Eng zat pawh
8	Life Donor	Rs 2000 (kum 1 atan)

           

Heng member nihna hrang hrang leh thilpek dang te hian Certificate leh membership a zirin thildang pawh a keng tel a ni.

7. Collector te dinhmun leh mawhphurhna:

7.1. Thilpek lakhawmtu an ni: Mipuite thilpek lakhawmtu ber nimahse collector te hi harsatna tawk nasa leh sawiselna tawk nasa ber an ni hial awm e. Kohhran thilah khawn dang a lo tam nen inthlahrung taka mi ina an kal kual hian, a rate a sang lutuk a, kan tlin lo; khawn te sep a tam lutuk a; pawisa kan nei lo; rate hluiah member kan ni tawh; chhungkua kan lo inrawn khawm anga lo kal leh rawh; BSI te chu a hausa a lawm, thawhlo pawh ni ila a khawl hnem tawh, etc tih ang chi thil beidawnna tur an tawng hnem em em a, hreh tak leh zak tak chunga an vah kual a ngaih chang a tam. Mahse tawngtaina nen hlawhchhamin an la awm bik ngai lo. Bible Society chakna hnar an ni. 

7.2. Bible Society tulna leh pawimawhna mite hnena tuhtu an ni: Thilpek la khawmtu an ni kan tih rual hian chu mi chauh chu an nihna emaw an ti ang tih a hlauhawm. An mawhphurhna a sang em em a, sum knawntu satliah an ni lo. BSI rawngbawlnaa ke pen thei tura mite fuihtu, sum pe chhuak thei tura hmintu turte an ni. Mi te thinlunga Lal Isua mission chhunzawm duhna leh neih ang tawk tawk thawh ve duhna thinlung puttirtu te an ni. BSI chak leh chak loh hi collector te kutah a in nghat  lian em em.

7.3. A ground levela thawktu an ni: Hna reng reng chu dawhkana thawh chi a awm a, awm hmun atanga tih fel chi a awm a, a takah, a hmunah (ground level) thawh chi a awm bawk. Bible Society Committee zawng zawng te ke nia a tak taka thawktute chu collector te hi an ni. Bible Society ah chuan eng committee level ah pawh hruaitute an pawimawh em em a, mahse kohhran ho te hnena hna thawk a BSI rawngbawlna mipuia keng kawhtu ber a bulthut te anni tih kan hriat reng a, anmahni pawh an inhriat reng a pawimawh.

Khaikhawmna

Heng BSI chanchin tlangpui kan chhiar leh hriat atang ringawt pawh hian hmabak a la tam zia leh tawp san mai mai chi kan la nih lohzia a lang chiang hle. Kan zavaiin, kan hma zawn theuhvah tan la a, mar pata kal thei tura kan mawhphurhna theuh kan vawn nun reng a pawimawh a ni. BSI Lalpan mawlsam rawh se.

 

ZIRTIR NIHNA LEH TUNLAI KHAWVEL

 “Zirtir nihna leh Tunlai Khawvel”

 - Danmawia Chawngthu

1. Zirtir nihna(Discipleship) awmzia:

1.1. Johana 15:8: He mi avangin ka pa chu chawimawiin a awm thin, tam taka in rah hian, chutichuan, ka zirtirte in ni ang.

La Isuan kei hi Grep hrui tak ka ni, nangni a peng te inni tiin tehkhinthu a sawi a, a zawmpui rah lo a piang a paih a, a rah a piang a ti thianghlim thin. Chutiang chuan amaha awm reng turin min duh a, amaha kana wm reng loh chuan kan rah thei dawn lo. Amaha kana wm reng a, kan lo rah chhuah hian Pa Pathian chawimawiin a awm thin, chu chu zirtir nihnaa kan tih tur leh kan nihna tur a ni.

- Isua nena inzawm tlat hi disciple nihna hmasa ber a ni

1.2. Johana 13:35: Thupek thar ka pek che u hi, inhmangaih ula, keiin ka hmangaih che u ang hian nangni pawh inhmangaih ula, in inhmangaih chuan mi zawng zawngin ka zirtirte in ni tih chumiah chuan an hria ang, a ti a

Hmangaihna hi Lal Isua thu ken bulpui a ni. Chu mi atang chuan chhandamna hnathawh te, thuthlung hlui leh thar inzawmna te, dan leh khawngaihna inlaichinna te, dan zawm dan tur te, ringtu nun kal zel dan tur te a lang fiah thin. Thupek tam tak Thuthlung hluiah kan kan hmu a, mahse Lal Isuan thupek thar min pek chu inhmngaihna hi a ni. “Nangnin min hmangaih chuan ka thupek te in zawm ang” a tih avang in Lal Isua neitu, zawmtu, hm angihtu chuan a thu pek kan zawm a ngai, chu chu midang hmangaih hi a ni. Kan inhmangaih tlanna hi zirtir nihna lanna, midangin an lo hriat theihna tur a ni.

-Isua nena kan inzawm tlatna rah chhuah chu inhmangaihna chu a ni.

1.3. Johana 8:31, Chuti chuan Isuan amah ringtu Jud ate hnenah chuan ‘ka thua in awm reng chuan ka zirtirte in ni tak tak ang…, a ti a’

Zirtir nih tak takna, nih reng theihna leh nih ngheh theihna chu a thua awm reng a ni. Engtin nge a thuah kan awm reng theih ang? A thupek awih leh zawm a ni mai. Mahse chu chu a harsa lai ber a ni. Pian thar mai hi a harsa lo. Isua zawm mai hi a harsa lo, mi va hmangaih mai pawh kan thei mai. Mahse harsa ber chu zirtirte nih tak takna, a thua engtik lai pawha awm reng hi a ni. Vawi khat va awih zuai, vawi khat va hmangaih zuai chu kan thei vek mai. Mahse nitin a thara Lal Isua thupoek awih a, kan veng te kan hmangaih reng theihna hi a zirtir te nih tak takna chu a ni.

- Chu inhmangaihna chu nitin a thar zeal kan nunpui hian a zirtirte kan ni reng thei ang.

2. Kohhran hmanga zirtir nihna

Kohhrana kan tel a, Lal Isua taksa, Pathian ram thlen tanna leh thlen famkimna luahlum tu, Pathian ram darh zelna tura thawktu chu kohhran hi a ni. Hmuh theih leh hmuh theih loh kohhran pawh nise, a pahnihin Pathian ram tana thawktu v eve a ni. Chu kohhranah chuan kan tel a, tangkai takin pathian rawng kan bawl thin.

Kohhrana rinawm: Chu kohhranah chuan kan in ziak luta, kohhran member kan nih tawh chuan chutah chuan kan rinawm tur a ni. Kohhran hi a la thianghlim a, Thlarau chenchilh a la ni reng. He hmunah hian Pathianin thu a la sawi reng. Kohhran chhuahsan zawnga kal a la hun lo. Kohhran hian Pathian rawng kan bawl tawh lo anih chuan Pathian in min kalsan mai ang. Pathian kalsan nih chu rinhleh theih a ni lo, a chiang. Chuvangin Pathian chenna leh a huhova Pathian rawng kan bawlna, kan intih chaka kan infuih tawnna hmun, kan thawh hona leh kan luankhawmna avanga Pathian ram zauh zelna hmun a nih avangin kohhranah kan rinawm tur a ni. Chu chu Krista nene inzawm tlatna pawh a ni.

Activity/Program a rinawm: Kohhran chu a kalzelna torah program a neih a tul thin. Program fel fai taka duan a nih loh chuan administration a buai thin. Mipui kalkhawm leh Pathian be ho thin te hian inawpkhawmna felfai tak kan mamawh a, a duh duh thusawi emaw, a duh duh lam emaw, duh ang anga awm nuaih nuaih a rem lo. Chutiangah chuan program kan maawh a, chung program hrang hrang te chuan activity a lo siam a, activity tih tur kan ngah tae m em a, kan zawh loh thleng dawn thaw emaw tih tur kan nei a, Pa ber kan chhuak zantin deuh thaw mai anih hi. Mahse engpawhnise chu program leh activity ah chuan kan rinawm phawt tur chu a ni si.

3. kan kalpeng thui tawh em?:  Tunlai khawvel han tih hian environment lam emaw, politics lam emaw, economics lam emaw sawi ka tum lova, Kohhran dinhmun leh kan rawngbawlna kalpui dan ngun taka thlirtute atanga fakselna thu kan chhiar fo te, kohhran huang pawna rawngbawlna ministry tam ta lutuk te, youtube leh tv lama rawngbawlna peng kan kalpui ta suau suau te chungchang hi a ni. Kristianna ah trend dang a lo in herchhuak mek a, chu chu tuna kohhran kan kaldan hrul deuhva inla hrang zawnga kalna hi a ni.

Chutiang khawvel atang chuan Tunlai hian social media ah kohhran kalphung selna leh duhkhawp lohna te, activity tam lutuk sawiselna te, sum khawn leh sum leh pai a involve nasa lutuk duh lohna te a tam ta hle mai. Tuna kan kohhran kal mek hnuaia zirtir kan nihnahi min lo question ta….

A chhan hrang hrang ni thei te:

(a) Thenkhat chu activity chauhin a khalh kal, activity a awm loh ruala rawngbawl thei lova in ngai tawp an awm.

(b) Hruaitu leh nihna avang chauhva rawngbawl an awm. Hruatu nih loh veleh BMP a tel tha peih lo, Kohhrana inhmang tha duh lo an awm thin.

(c) Sum leh pai thawh chhuah leh peipun, leh chalai vel hi rawngbawlna pui bera ngaihna a lian tawh lutuk

(d) Plan leh Project kan siam te hi activity base keimahni in awm tleina tur lam thil a tam a, chu chuan sum leh pai a ti ngai tam a, loh theih lohvin sum tuakna leh neih dan tur kan ngaihtuah a, chulamah chuan kan buai mah mah.

(e) Sum khawn leh sum tuak a tam lutuk a, kan activity 90% hi chu sum tuakna lam a ni deuh mai.

(f) Mi rethei leh khawsak harsa deuh tan kohhrana tui taka inhman a harsa ta deuh.

(g) Kohhran leh program te hian thangthar te a hip ta lova, zalen lo riauvin an inhria a, zalen taka Pathian fakna hmun an lo beisei ta.

(h) khawvel changkanna, kan hun neih dan, kan tui zawng, nuam tih zawng milin kohhran hi a inher rem thei lova..

(i) Kohhran ah hian mi hausa leh khawsa thei, sum leh pai nei deuh te an tlatlum lutuk ta.

4. Engtin ge tunlai khawvel ah zirtir tha tak kan nih theih ang? Sawi ho nise