THALAITEA PATHIAN THUA HARHNA

 

THALAITEA PATHIAN THUA HARHNA

Danmawia Chawngthu

Mizorama harhna lo thleng tawh hrang hrang te hian thu ken an nei hlawm a, an hnathawh dan bakah an thlen chin pawh a in ang lo. Harhna hmasa ber 1906-a lo thleng kha Chanchin tha lo darh zau zelna leh kristian lo pun zelna tura Pathian min pek a ni. Tichuan kum 1913 (Kross hlutna hriat thar lehna leh nun fimkhurna) te, 1919 (Lal Isua tuarna sawi uarna) te, 1930 (Kristian tlu leh kristian ni tha duh lo tea a thawh nasat avanga ringthar pun nasat) te, kum 1960 (Pianthar harhna leh ringtu nun nghehna) te, 1984 chho leh a hnua El-bethel harhna kan tih te, Mizoram pum huap kher lo, kohhran mal leh khawtlang mal ang tea harhna te, Kelkang harhna thlengin Mizoram hi min tuam vel thin. Heng harhna te hi a hunlai mila kohhran leh mipuiin kan mamawh ang zela Pathian min pek a ni.

Tichuan, tunah hian Thalaite ah harhna a thleng nasa em em a, chu harhna chu lam luih luih lam a ni ta lova, inkhawm tlut tlut lam a ni hek lo; zai hlim lam ngawr ngawr pawh a ni lova, Pathian thu zirchian duhna leh hriatfiah duhna- Pathianthua harhna chu a ni. He harhna hi zirchian a, ngaihven a, tuipui tlak a niin ka hria. He ti hian a nihphung hrang hrang te han chhui zui zel ila:

1. Pathian thu thlendikna a ni: “Pathianin, ni hnuhnungah te chuan heti hi a ni ang a, mi zawng zawng chungah ka thlarau ka leih ang a, tichuan in fapa te, in fanuten ka thu an hril ang a, in tlangval ten inlarnate an hmu ang a… (Tirhkohte 2: 17)” Ni hnuhnung lam hi sawizui ka tum lem lo, mahse thil lang chiang em em chu tun ang reng a thalai ten Pathian thu an buaipui a, Pathian thu an hril nasat hi a la awm lo. Pathian thu hi a thleng dik chho zel a ni.

2. Pathian thu zirchian duhna: Tun hma chuan (ti ve khanglang ila) kum lama upa zawk leh rinna lama puitling zawka ngaih pastor te, kohhran upa te, revival/evangelist speaker te thusawi hi thalaite ei ber leh an innghahna a ni thin. Mahse vawiinah chuan mahnia Pathian thu zirchian duhna leh hriatfiah duhna an lo nei ta. An ngaihtlak leh an dawn ringawtah an duhtawk tawh lo, anmahnia buaipui a, hmufiah a, hrethiamtu nih an tum ta.

3. A sawitu nih duhna: Pathian thusawi hi a chunga kan sawi te kuta awm tura ngaihna a lian thin. Tun hma deuh chuan thalai te hi TKP rawngbawlnaa loh theih lohva thusawi a ngaih pawha huphurh em em thin, pehhel hram duh thin an ni. Mahse tunah chuan a ngaithlatu leh dawngtu ni ngawt lovin, a sawitu nih an lo duh ta.

4. Thlarau Thianghlim awmpuina: Fianriala Pathian pawl an uar. Ramhnuaiah emaw hmun fian rialah tuma tihbuaitheih lohva tawngtaia Pathian pawl tam na na chu Thlarau Thianghlim pawhin a tanpui a, thusawi an thiam a, an sawifiah thiam a, an inringtawk a, mahni dai chin leh chan chin atanga sawi an nih hlawm avangin a fiah a, a ngaihnawm em em zel a ni.

5. An influential: An takna, an beih nasatna, an inpekna, an thahnemngaihna leh an tih tak takna hian mi dangte hneh thei turin a pui a, ngaihven an awl a, ngaihsan an awl a, tunlai changkanna social media an hmang tangkai bawk nen mi an hneh hma em em a ni.

Tichuan, achunga kan sawi bak pawh a tam ang. He Pathian thua harhna hian thil tha tam tak a thlentir tawh a, Zoram khawvelah hian nghawng tha tak tak a la nei dawn chauh niin alang bawk. Mahse rinna lama puitling leh kum lama rual u leh thluak dai te hian kan venpui a, kan ngaihven reng a ngai. A chhan hrang hrang te:

1. Kohhran hnualsuatna leh ngaihpawimawh lohna anmahniah a intuh nasa viau thei. Kohhran (denomination, visible church) tel lova khawsa thei leh tlei ve tawka inhriatna a awm nasa thei bawk.

2. Kohhran hmasawnna leh siamthatna lam aia inlakhran duhna leh tlanchhiatsan duhna a lian viau thei.

3. Pastor, Upa leh rawngbawltu hmuh hniamna te, ngaih san loh leh ngaihpawimawh lohna te, an tel lova Pathian thua tleina te, Bible hrilhfiahna kawnga thiam ve tawka inhriatna te a lo len zel chuan, an la extreme mah mah ang tih a hlauhawm!

4. Pawl bik insiam a, fellowship leh tawngtaihona neih fo te; chhuah khawm fova, Biak in leh mahni in lum kalsan zawnga program an siam fo chuan kawng dangah thlemna a nasa dawn. Chu chu kan venpui a ngai a ni.

Mizoram kohhran history kan en chuan harhna kan tih zawng zawng khian thil tha hlang a thlen bik lo. Uirena te, in nausenna te, minu leh mipa khawsak dunna te, hmangaihna ram tih te, pawl chhuahna te, kohhran inthendarhna te, adt.. a thlen ve tho a ni. Harhna phena Pathian thiltum tihhlawhtlin anih piah lamah hian kan hmelma hian hna a thawk ve reng a, remchang a melh ve reng avangin nghawng thalo a nei ve thin. Chutiang ang chu tunlaia thalaitea Pathianthua Harhna ah pawh hian a awm thei a ni. Pathian thu hriat duhna leh zirchian duhna an nei hi a va ropui tak em. An thalai pui tam tak nun kawng dikah an hruai mek zel a, Pathian thu hrila vahpui duh (evangelist, missionary, etc) an rawn awm zel bawk ang. Chu chu he harhna result hi ni se a duhawm hle a ni. Kawng leh lamah chu mi phena kan hmelma pa hnathawh lo awm thei leh venpui an ngaihna kan han thailang tel hram a nih hi.